ميمي: والله عال يا سي سراج بقالنا نص ساعة مستنيين الكرسي الهزاز يجي من عند النجار….وانا ورايا تصوير! عجباك العطلة دي !!
سراج: يوووووو بقي بالهداوة…..الغايب حجته معاه ….
ميمي: اه ما وقت أمثالك الشعبية دلوقتي!! يعني بدي افهم انت اللي كسرت الكرسي ….و انا قلت لك نصلحه عند محل أنتيكات” مسيو ادمون”….لكن سيادتك قلت : لا ادمون ده مغلواني….. تقوم تبعت الكرسي يتصلح عند نجار بيصلح روبابيكيا !
سراج بصوت عالي: من فضلك ….انا عارف انا بعمل ايه … عم حنفي النجار ده ايديه تتلف في حرير…..ده نجار معرفة من ٣٠ سنة….ولا هو عشان مبيرطنش بالفرنساوي و في حي شعبي يبقي تفضلي عليه ادمون الحرامي …ده نصاب….ييضحك عليكي انتي و صاحباتك عشان ياخد فلوسكم….بقي بذمتك انتي مصدقة ان الانتيكات اللي بيبيعها اصلية !! والله ولا انتي فاهمه حاجة اساسا !!
ميمي: pardon ca suffix كفاية مش قادرة أسمع منك كلام….. مش مستعدة افور دمي قبل التصوير هما ١٠ دقايق لو مجاش همشي !!
سراج: انا مش فاهم ايه لازمة انتظارك متروحي التصوير….
ميمي: لا mon cher ده بُعدك . . انا لازم اتمم على الكرسي واتأكد انه مبوظهوش….ده كرسي طراز لويس السادس عشر …..
سراج : ده اللي انتي فالحة فيه الانعرة ….تلاقيه جايبه من سوق الكانتو….انا بفكر اجيب خبير انتيكات ….واروح محل مسيو ادمون بتاعك عشان اثبت أنه نصاب….
عم ادريس دخل عليهم وقال: الاسطى حنفي وصل يا فندم ….
سراج ابتسم…. و قال: شفتي بقي اهو وصل ….اتفضل يا اسطى حنفي يا اهلا وسهلا ..
دخل راجل في الستين من العمر و راه صبي شايل كرسي ملفوف بنايلون….
حنفي: حط الكرسي هنا يا نبلة !
نبلة حط الكرسي…. و ابتدا يشيل الورق الملفوف عليه !!
ميمي: الحمدالله انك لفه كويس كنت خايف يتوسخ !!
سراج رد بسرعة: لا يتوسخ ايه !! ورشة عم حنفي فلة …
عم حنفي: بلا قافية يا هانم احنا عارفين شغلنا ….و عمرنا ما نسلم حاجة نص و نص ….فك النايلون يا نبلة !!
نبلة فك النايلون و بصت ميمي و سراج على الكرسي و ميمي قالت: impossible vraiment كأنه جديد مذهل!!
سراج مبتسم : شفتي مش قلت لك ….انا واثق في اسطى حنفي ده فنان….
حنفي: بلا قافية…. انا مبشتغلش في الحاجات الانتيكات دي لانها عايزة وقت و شغل كتير….بس عشان خاطر عيونك يا سي سراج لانك بقالك فترة مشرفتنيش في الورشة….. مرضتش ارد لك طلب …..يلا استئذن انا !! يلا يا واد يا نبلة ….
سراج: لا …..لا تمشي ازاي؟؟ و الحساب !
حنفي: لا ….ده كادو مني للهانم ….احنا ولاد بلد و نفهم في الاصول ….
سراج: مستحيل …..انا قلت لك الرقم اللي هتقوله هدفعه….
حنفي: لو عايز تجاملني….. تيجي عندنا الحارة و اعزمك على اكلم كباب من عم “سوكا” بقالك زمن مجتش عندنا … خلي الحارة تنور ……احنا يشرفنا زيارة اهل الفن اللي بيمتعونا بفنهم….
سراج: بس كده يا سيدي….. ده انا اجي لحد عندك….ده انت ابو الكرم و الشهامة . .. طول عمرك ابن بلد يا عم حنفي….بس انت برده مش هتمشي الا لما تشرب القهوة معايا….ولا هتكسفني…..يلا يا نبلة تعالوا معايا على اودة المكتب…..يا ادريس هات لنا القهوة….
حنفي: بلا قافية قهوتي ع الريحة يا عم ادريس…. و نبلة زيادة تسلم و تعيش….
ميمي: عن إذنكم عندي تصوير…. mille merci عم برعي!
حنفي: لا…… حنفي مش برعي يا ست هانم…..
ميمي: pardon ……استئذن انا!
سراج: ايه رايك بقي في دور طاولة معتبر…..مع القهوة!
حنفي: لا يا سراج بيه ….ده انا فايت الورشة وقفة على رجل….اصل عقبال اولادك عندنا جهاز عروسة بنوضبه لانه فرحها بعد العيد….. كل سنة وانتم طيبين
سراج: يا راجل ساعة زمن مش حكاية….و الله وحشاني قعدتك و خفة دمك…..
عم عنفي: تسلم وتعيش انا هشرب القهوة واتكل على الله
سراج: خلاص يبقالي عندك دور طاولة….
عم حنفي: عينيا لما تجي لنا الاعبك دورين يا غالي يا ابن الأصول…..
سراج طبطب على كتفه وقال: ربنا يديم المعروف….
الحوار
ملحوظة: الحوار من خيال المؤلف، و لا يمت للواقع بصلة انما هو استحضار لذكريات الزمن الجميل