رمزى: بونجور يا احلى ناس!
فؤاد: اهلااااااااااا انت شرفت !! ليه ما هو بدري…. ما كنت تتأخر ساعة كمان….. ما احنا فاضيين لك !!
امينة هانم : بالراحة يا فؤاد مش كده ….هدي أخلاقك أومال!!
رمزي: في ايه بس ….اولا انا بعتذر ع التأخير و بعدين …
فؤاد قاطعه: طبعا هتقول ان السكة كانت زحمة او الاوتومبيل بتاعك عطل او اي حاجة من إياهم!!
رمزي: لا مش كده انا بصراحة راحت عليا نومة و للأسف أمين الطباخ بتاعي نزل يشتري طلبات ونسي يصحيني
امينة هانم: حصل خير
فؤاد: لا بردون أمينه هانم ده مش مبرر….يعني ايه !! مفيش ال تزام و ….بص ل رمزى وقال: لا ده سياتك مش بس متأخر لا كمان معجباتك جايين الأستوديو… و دخلوا البلاتوه و لما الريجيسير قالهم ممنوع… قالوا له أن أنتم مديهم معاد!! و جم يسألوني عليك !!! لا ده انا كمان هشتغل لك سكرتير…. ضرب كف على كف وقال : هُزلت و الله….
رمزي: هدي اخلاقك اومال ….البنتين دول قرايب شوشو هانم جارتنا ف جاردن سيتي وانا وعدت شوشو هانم اعمل لهم تست كاميرا …بس دي كل الحكاية!
فؤاد: و من امتى بنعمل تست كاميرا وسط الشغل…بقلك ايه انا خلاص جبت اخري منك يا رمزي …طب والله لولا امينة هانم انا كنت سبت اللوكيشن….يا بني ادم انا عندي مسرح بالليل يعني لازم اخلص و اروح ارتاح عشان المسرح….. لكن انا بكلم مين!! ملك الاستهتار رمزي بك !!
امينة هانم: و بعدين يا فؤاد مش كده اومال أولا رمزي قال الحقيقة و كلنا ممكن تروح علينا نومة…..متفورش دمك ….انا كمان عندي مسرح زيك…الامور متتخدش كده بالهداوة….و بصت ل رمزي وقالت : انت بردك يا رمزي لما يحصل ظرف طارئ زي كده واجب تضرب تلافون للاستوديو عشان المخرج يحضر مشاهد تانية و منتعطلش
رمزي: عندك حق يا هانم المرة الجاية هعمل كده بس الاول بدي اروح اعتذر
فؤاد : خلاص قبلت اعتذارك حصل خير !!
رمزي: لا انا اقصد اعتذر للبنتين اللي مستنيبن جوة عشان اتأخرت عليهم
فؤاد ضرب كف على كف وقال : لا ….ده هينقطني!!!
امينة هانم بتضحك : مش ممكن يا رمزي مش هتتغير ابدا عفريت من يومك !!
الحوار من خيال المؤلف و لا يمت للواقع بصلة إنما هو استحضار لذكريات الزمن الجميل
#بقلمي_مروة_الحمدي