حوار بين إسماعيل ياسين و ماري منيب من تأليفي ⚘
سمعة: يا صباح النور والبنور يا ست ماري!
ماري: صباح الفل يا سمعمع ازيك ….فينك بقالي جمعة مشفتكش!!
سمعة: كان عندي تصوير في اسكندرية….و الله الجو كان عال ….وكانت القعدة ناقصاكي….. خصوصا اني حبيبتك الست ميمي شكيب كانت موجودة….
ماري بعصببية: انما متجبليش سيرتها…..انا دمي محروق من اخر نوبة شفتها…..هي حكت لك!
سمعة بيضحك: ايون….. و عرفت التفاصيل المملة….بقي يا ست ماري تعملي ل ميمي شكيب بط و محشي….مانتي عارفة انها علطول عملة ريجيم !!
ماري: ما هي اللي طلبت مني اعمل بط لسراج جوزها و صعب عليا متدوقش منه….يا عين امها علطول عايشة ع المسلوق و الشاسيه…..
سمعه: ايه الشاسيه ده…. تكونيش تقصدي السوتيه…..
ماري: ايون هو ده….بذمتك حد يرفض اكله بط و محشي!!
سمعه: لا انتي عارفة إني ضعيف ادام طبيخك….. و يا ستي احنا فيها نطب عليكي انا والقصري و نخلصك من المحشي و البط كله ….هو احنا في ديكي الساعة….
ماري: من عينيا هو انا عندي اعز منكم….
سمعة: إلا بالحق…. روحتي ل عادل خيري ابن الاستاذ بديع سمعت انه بعافية….
ماري: اه يا خويا….. عمل أشعة و حجزوه في الاستباليا…..و بديع يا قلبي زعلان اوي عليه….بس بأمر الله العلاج يجيب نتيجة النوبة دي…اصل الحكيم اللي بيعالجه من بلاد برة ومشهور اوي…..كتر خيره فطين عبد الوهاب اول ما سمع أنه الحكيم في زيارة لمصر حجز علطول عنده ل عادل….
سمعة: ربنا يشفيه ويعافيه….. انا جايب لك بقي مفاجأة معايا انما ايه ….حاجة عال العال…..سيناريو لفيلم جديد و معانا كمال الشناوي و كاريمان و ميمي حبيبتك…. و الغلباوية وداد حمدي ….
ماري: يا وش السعد انت…..افلامي معاك كلها كسرت الدنيا….استني بقي يا سمعمع لما اعمل لنا فنجانين قهوة من البن المحوج المخصوص بتاعي….عشان نقرأ سيناريو الفيلم على رواقة…..
سمعة: ايوة بقي…..انا بحب اوي القهوة بتاعتك بتعدلي دماغي و تخليني أركز اووووووووووي
ماري: بالهنا والشفا على قلبك…..
الحوار