ملك: ايه يا ست ليلى مفيش بونجور يا عمته….
ليلى: بردون عمته صباخ الخير…
ملك: مالك مكلضمة على الصبح !
ليلى: انا غلبت مع بابا بصراحة….لسة كنت بكلمه امبارح بالليل في التليفون عشان اقوله على رحلة الفيوم …قالي مش هتروحي إلا لو مراد اخوكي يجي معاكي!
ملك : طب و ايه المشكله…ما طول عمر مراد بيروح معاكي الرحلات…
ليلى: اديكي لسة قيلاها…. طول عمره بيجي معايا….انا زهقت انا مش صغيرة….انا بشتغل وعندي ٢٢ سنة….ايه المشكلة اما اطلع رحلة مع زمايلي في الشغل…
ملك : يا بنتي ابوكي خايف عليكي….و احنا في دنيا بقت صعبه…..عاداتنا وتقاليدنا متسمحش لشابة تسافر لوحدها وكمان تبات برة….. بردون دي مش اصول !
ليلى: طب ايه رأيك أن مراد مش عايز يروح …قال عنده امتحانات في الجامعة….
ملك : طب استهدي بالله….قومي صلي الصبح….. و افطري وانا هكلم ابوكي في أسيوط….احتمال اقدر اعمل حاجة….
ليلى مبتسمة: بجد عمته mille merci طول عمرك طيبة و تساعديني…..
ملك: بس ارجو ان ثقتي فيكي تكون في محلها ….انا اللي مربياكي… انتي نسيتي أن سنين الجامعة قضيتهم معايا هنا في القاهرة….انتي بنتي اللي مخلفتهاش….
ليلي بتحضنها: حبيبتي يا عمته ….عن اذنك اروح اصلي بعدين اعملك احلى فطار ….الاومليت اللي بتحبيه بالمشروم و فول بالزيت و اللمون….
ملك : الله ….الله….طب متنسيش يا روح عمته الشاي بالنعناع في كوباية ازاز…
ليلي: من عينيا
ملك : تسلم عينيكي يا ست البنات….
ملحوظة: الحوار من خيال المؤلف، و لا يمت للواقع بصلة، إنما هو استحضار لذكريات الزمن الجميل