حوار بين الفنانة سناء جميل و الأستاذ فؤاد المهندس في كواليس تصوير مسلسل “عيون”
سناء: بونسوار يا فؤاد
فؤاد: اهلا يا استاذة…كيف الحال جاهزة للتصوير …
سناء: في الواقع كنت جاهزة…بس للأسف مساعد المخرج لسة قايل لي أن في كاميرا خسرانه فبيشوفوها….
فؤاد: طب يا ستي حصل خير….تعالي ناخد فنجان شاي …
سناء: أفضل أشرب مية…انت عارف محبش اكون تقيلة قبل التصوير …
فؤاد: طب …. ” بينادي على عامل البوفيه ” يا سيد …من فضلك الشاي بتاعي و مية للأستاذة سناء….
سناء: بردون يا سيد معدنية طبعا …
سيد: عيوني يا أستاذة….
فؤاد: مش عارف ليه حاسس ان مزاجك مش مضبوط انهردة…
سناء: احساسك في محله يا فؤاد….بصراحة بقالي فترة بيتعرض علي شغل للمسرح…بس الورق مش عاجبني…انت عارف عشقي للمسرح …بس برده ده لا يمنع اني متمسكة بنص جيد …الورق… الورق يا فؤاد ….مفيش نص عاجبني….
فؤاد: انا فاهم طبعا…..و مقدر حبك للمسرح….بس الصبر يا سناء….و ادينا بنعمل شغل للتلفزيون…صحيح مش هيروي عطشنا للمسرح بس…اهو محاولة….
سناء: الناس اتغيرت اوي يا فؤاد…مش واخد بالك حتى وانت في الشارع سايق عربيتك….او بتشتري حاجة من السوبر ماركت…. الناس بقت عابسة و عصبية و بردون مبقاش فيه ذوق ولياقة ….. و لا كياسة في الكلام…. ايه اللي جرى….
فؤاد: المجتمع اختلف …ظهرت طبقة جديدة معاها فلوس و طبعا ده مش عيب…. بس للأسف الطبقة دي افتكرت انها لها اليد العليا بفلوسها …و للأسف هو ده اللي حصل ….الفلاح مبقاش فلاح، و العامل مبقاش عامل …كله بقي عايز يلبس قميص و بنطلون و يكون افندي….رغم أن كل واحد في المجتمع له دوره المهم الحيوي وده لا يقلل من شأنه …
سناء: بالمناسبة…. معجبة اوي بالبرنامج بتاعك في الراديو أظن اسمه “كلمة ونص”؟
فؤاد بيضحك: لا يا ستي …كلمتين و بس….اهو عجبني عشان فضفضة….زي ما تقولي تنفيسة…..في ٥ دقايق اناقش مشكلة في المجتمع و اعرضها…
سناء: وانت اسلوبك ياي….. جنان….
فؤاد: تسلمي يا ستي….يلا بقي…. احسن المخرج اهو بيشاور لنا …
سناء: يلا بينا….
ملحوظة: الحوار من خيال المؤلف ، ولا يمت للواقع بصلة ، إنما هو استحضار لعطر الزمن الجميل .