صلاح: هو يعني حبكت تمسحوا الأرض وقت ما اجي ازور خالتي!!
شادية: اعمل لك ايه حظك هباب قبل ما تيجي بخمس دقايق القط مشمش،وقع برطمان العسل على الأرض خفت يخسر السجادة قلت انضف …مفيش دقايق سيادتك شرفت و اخدت في وشك جري على اودة نينة !! ايه مسروع علطول
صلاح: طب كنتي نبهيني!!! ايه ملكيش لسان ده انتي لسانك مترين !!
شادية: و بعدين بقي في بجاحتك دي..مش كفاية انك وقعت المية على الأرض و اديني هنضف تاني !! ده ايه يا ربي الغلب ده …فاتن و امال صحباتي جايين وانا ولا جهزت و لا لحقت اعمل حاجة اقدمهالهم
صلاح: بالمناسبة لو تحطي لي غدا يبقي كتر خيرك !! ده انا واقع من الجوع !!
شادية: لا حضرتك شطبنا…. خش سلم على خالتك اللي هي أمي و ملكش عندي إلا كوباية شاي!!
صلاح: طب سندوتش جنبها!! هو انتم ايه بتوفره!! خالتي مكنتش تقدم لي الا المحمر و المشمر!!
شادية: و خالتك راقدة دلوقتي وانا اتهلكت ابقي كل في بيتكم سيادتك
امها بتنادي من بعيد: يا شوشو بترغي مع مين عندك !!
صلاح بصوت عالي: ده انا صلاح يا خالتي و شادية بنتك مش راضية تأكلني!! و بتذلني!! يرضيكي كده!!
الام: ده ايه الكلام ده اغرفي لابن خالتك…اخص عليكي …انتي تكوني ست بيت إنتي!! ده احنا عندنا ملوخية تستاهل بقك!
صلاح فتص من الضحك و شادية متأففة: حاضر يا نينه هحط له الغدا !! و بصوت واطي: بالسم الهاري!!
صلاح: بس وحياتك متنسيش الطرشي البلدي و على الأخص العيش يكون سخن و مقرمش…اصل الملوخية تحب العيش!!
شادية رميته بمخدة صغيرة أخدتها من على الكنبة و قالت:
جتك سخونية في جتتك يا بعيد ….و هي رايحة المطبخ متأففة: انا خلاص بقيت مرمطون البيت ده !!
صلاح: متبطرميش عقبال ما اشقر على خالتي يكون الغدا جاهز….بقي انتي هتكوني ست بيت انتي…بنات اخر زمن
الحوار
بقلمي_مروة_الحمدي