امال: صباح الخير يا ماما
زينات: اهلا يعني لسة فاكرة ان ليكي أم!!
امال: ليه بس بتقولي كده عارفة اني مقصرة بس،صدقيني مشغولة اوي بحضر للحفلة اللي أنور جوزي هيعملها في العزبة!
زينات: انا نفسي اعرف سي أنور ده جنس جبلته ايه يختي كل اسبوعين حفلة في العزبة و اشي عشا و اشي معازيم و مفيش مرة…مرة لله يعزمني انا وابوكي!!
امال: ايه الكلام ده يا ماما هو احنا محتاجين!!
زينات: اه ….لا لا اقصد من باب الذوق و الواجب….وانتي يا باردة متجيش منك تقوليلي اعزم اهلي ؟؟
امال: لا يا ست ماما احنا عندنا كبرياء
زينات: كبرياء ايه و هباب ايه ده ابوكي من ساعة ما طلع معاش حتى الكبرياء مش هنشوفه…. ما هو لما تعزمينا في العزبة و ابوكي يتكلم مع البهوات صحاب جوزك جايز ربنا يأذن و يشوف شغلانة مع حد فيهم !!
امال: بابا سنه كبر و محتاج يرتاح بعدين أنتم جوزتوني و عملته اللي عليكم خلاص !!
زينات: عملك اسود يا بعيدة طب و سامي اخوكي اللي لسة في الجامعه نصرف عليه منين !! نأكله طوب و جوزك اسم النبي حارسه صاحب مصنع اد الدنيا مفيش شغلانة لابوكي!!
امال: انا مقبلهاش على كرامتي و بعدين سامي أخويا راجل و المفروض يعتمد على نفسه!!
زينات: بقلك ايه بلاش كلام فارغ اعملي حسابك انا و ابوكي واخوكي سامي جايين الحفلة اللي في العزبة بلغي جوزك!!
امال: تانسوا و تشرفوا بس حماتي تفيدة هانم جاية و انتي مبتحبيهاش!!
زينات: برده جاية متحاوليش وانا مالي و ملها
امال: طب من فضلك يا ماما دي حفلة تنكرية يعني لازم تلبسي لبس تنكري!!
زينات: بلاش حجج فارغة …. هالبس لبس امنا الغولة جايز حماتك تتسرع و لا تتجلط واهو نخلص منها بالمرة!!