القاهرة، حي مصر الجديدة
تقطن في أحد البنايات العريقة عائلة الأستاذ رفعت عبد الدايم. وهو مهندس يعمل في حي مصر الجديدة. و زوجته دكتورة امتثال، تعمل في هيئة التأمين الصحي. و لديهم شابة تدعي مي. و هي خريجة كلية الاقتصاد و العلوم السياسية، و لازالت تبحث عن عمل.
في الشقة المقابلة، تسكن عائلة فؤاد ابو رحاب، و هو تاجر اقمشة ميسور الحال و زوجته الحاجة أمينة،ربة منزل. و لديهم شابة تدعى اسراء خريجة كلية تربية رياضية، و تعمل مدربة ايروبكس في احدي صالات الجيم المعروفة في المعادي، و اخوها رمزي يعمل تاجر موبايلات فهو لم يكمل تعليمه الجامعي. و قرر يتجه إلي العمل الحر .
بين تلك العائلات صلة صداقة و عشرة طويلة ممتدة لسنوات. و اليوم سيُفتح الستار عن أول حكاية في عمارة “ولاد الاصول” وهو اسم البناية التي تدور فيها الحكاية .
في الصباح الباكر داخل منزل المهندس رفعت عبد الدايم
رفعت: صباح الخير يا امتثال فين الفطار كده هتأخر عالشغل!
امتثال: ليه هي بنتك مي لسة محضرتوش؟؟
رفعت: باين انها لسة نايمة !
امتثال: طب هقوم اهو …قامت متكاسلة و هي بترطم: متحضره لنفسك ايه الغلب ده!!
في غرفة المعيشة مائدة مستديرة وضعت عليها امتثال الفطار زي اي طبقة متوسطة الحال فول و طعمية و جرجير و جبنة بيضا
وهما يتناولون الإفطار دخلت بنتهم مي
مي: صباح الخير
امتثال: ايه يا بنتي مش قلتي هتصحي بدري عشان تدوري على شغل!
مي مبوزة: أنا بصراحة زهقت ٦ شهور بدور و بلف على بنوك و اقدم ورق و ولا الهوا…انا عارفة لازم واسطة كل زملائي اللي اشتغلوا في بنوك كبيرة وسايط
رفعت: ارجع لنفس الموال و احنا يا بنتي وسطتنا ربنا …..
مي: و نعم بالله….. معلش يا بابا مودي زفت…..
رفعت: مودي مين ده يا بنت!!
مي: مودي يعني مزاجي يعني خُلقي ضيق استحملوني!!
امتثال : مانت يا رفعت لو كنت كلمت جارنا اللي في الثالث ثروت كان شاف لها حاجة ده راجل ايده طويلة
رفعت: بقلك ايه بلاش قلة قيمة الراجل ده مريب انا مش فاهم له شغلانة….. لنا حدد دلوقتي يقولك انا “رجل أعمال” اعرفي انه نصاب!!
امتثال: بقي يا راجل عشان ربنا فاتحها عليها يبقى حرامي بلاش حقد بقي !!
رفعت : حقد!!! اسحبيها والا و ربنا ما اخليكي تطلعي عندهم تاني…… طبعا ما مراته الحاجة زهرة كل شويه تغيظك بيشتروا ايه …و أكلوا ايه ….وسافروا فين …..وانتي تيجي تطلعيه علينا ..يبقى مين اللي حقود!! ولية خُلل!
امتثال ؛ انا خلل أخص عليك !!
مي: متصلوا على النبي هو انا ناقصة توتر……بقلكم ايه انا احسن اروح اتخمد!
امتثال: طب كلي لك لقمة !!
مي: نفسي اتسدت!!
رفعت: عجبك كده . .ولية نكد انا هروح الشغل ارحم لي …..
اخد مفاتيحه والموبايل ……و توجه إلي الباب و رزعه جامد وراه ….
مفيش ٥ دقايق كانت امتثال كمان لبست و اخدت شنطتها و توجهت لعملها ……بقيت مي لوحدها في البيت نايمة و بعد ساعتين رن جرس الباب ……و فتحت مي الباب و ارتسمت ابتسامة على وجهها وقالت…..
كوفرتة_مرمر_الحلقة1
بقلمي_مروة_الحمدي