شكوكو: برده مفيش فايدة فيك يا سي أنور….البعيد مبيحسش… احنا لسة مصالحين بينك و بين الست ليلى امبارح….تقوم دلوقتي بدل ما تروح تتغدى مع مراتك تقوم رايح مشوار من اياهم!!
انور: و مين قالك يا ناصح اني مش مروح…
شكوكو: لاني سمعتك بتكلم واحدة من اياهم ف التلافون و بتقولها ” استنيني يا كيكي في جروبي الساعة ٣ … و اوعي تتأخري….
انور “مرتبك”: دي….دي واحدة قريبتي وعندها مشكلة!!
شكوكو: ده اصله ايه ده…..ما بلاش الاصص البايخة دي…. انت مفيش فايدة فيك ….و بعد كده مجيش تقولي اداري عليك …يعني لو الست ليلى سألتني مش هكذب….انا زهقت من الاعيبك!!
انور: ولا الحوجة ليك ….ربنا يخلي لي اسماعيل ياسين هو ده الصاحب بجد….يا حبيبي يا سمعة!!!
شكومو: هأوووووو…… نسيت اقولك اني اتفقت مع سمعه محدش فينا يداري عليك بعد كده ….اللي يشيل قربة مخرومة يا حلو تخر بلا قافية على دماغه….
انور: ولو حلفت لك ان كيكي دي واقعة في مشكلة بجد تصدقني!!
شكوكو: قالوا للحرامي احلف…. ولا عمري هصدقك….. انت معاك ست جوهرة تتاقل بالالماظ……ليه الرمرمة بقي !!
انور: يا شكوكو يا صاحبي…. المدمن بيقلل الجرعة مينفعش يبطل مرة واحدة…
شكوكو: لا وانت الصادق ذيل الكلب عمره ما يتعدل…. عامة بشوقك…. انا شخصيا مش هداري عليك تاني ….
التليفون رن…..شكوكو رد: الووووو……. مين عايزه …..مين سي أنور…..مين معايا ….طيب….لحظة…..
و بص ل انور: الست كيكي!
انور “مكشر”: قولها اني حصل لي ظروف و مش هقدر اروح !!
شكوكو” مبتسم”: بصي يا ست تيتي…..يووووووو….معلش كيكي…. ايه غلطنا في نهج البردة….سي أنور بلا قافية مش فاضي…..يوووووو قلنا مش فاضي…. بيقولك مش هيجيي….الله ….و انا مالي ….هيخلص امتي!! كمان عشر سنين ….زوقي عجلك بقي ….و رزع السماعة…. يا باي ده انتي لازقة بغرا…..
و بص ل أنور: عفارم عليك يا ابو الأنوار….ايوة كده عاشت الرجالة….
انور : طب يا خويا …ضميرك استريح دلوقتي….يلا بقي ايدك على ٢ جنيه !!
شكوكو: و دول بتوع ايه ….
انور : اخوك مفلس و ليلي انعردة عملالي غدا معتبر عشان اتصالحنا….يرضيك ادخل عليا بايدي فاضية !! هجيب لها بوكيه ورد معتبر ولا ايه يا ابو المفهومية !!
شكوكو: يا بوي ورد ب ٢ جنيه …ليه ورد لولي !!
انور: لا مانا كمان هشتري طبق بسبوسة عشان هي بتحبها و علبة سجاير و….
شكوكو: خلاص خلاص….. هتحكي اصل حياتك ….و حط ايده في جيبه مفيش غير جنيه بوشه اهو!!!
انور: لا مينفعش!!
شكوكو : طب هاته بقي مفيش….خالص!!
انور: لا خلاص ينفع ….شكرا يا سيدي منحرمش….
شكوكو: ما ينوب المخلص….يعني انا احاول اصلح اخلاقك تقوم مغرمني!!
انور: شفت بقي ضميرك كلفك اد ايه !!
شكوكو: هأووووووو كله بثوابه…..سلامي للست ليلى….
انور: يوصل….نهارك سعيد
شكوكو : سعيدة مبارك …
الحوار
بقلمي_مروة_الحمدي
حواديت_مروة_الحمدي