حفيدتها شيماء وقفة في الشباك الحجة تحية: شيماء يا بت يا شيماء….
شيماء: ايوة يا ستو…..
الحجة :فين الشاي يا بت !
شيماء: لسة المية مغليتش بعدين انا قلت لك نحط شاي في الترمس بدل ما اقوم كل شوية ….زهقتيني بعمايل الشاي دي!
الحجة: اخص عليكي بت قليلة الرباية….ترمس ايه واحنا طالعين رحلة..ده انا ضهري وجعني من عمايل محشي ورق العنب اللي انتي طلبتيه…..مش قادرة اقف على رجلي من امبارح….
شيماء: النبي ايه….ده انتي قعدتيني جنبك عشان احشي معاكي و عملت تلت ربع الحلة…
الحجة: طيب يا لمضة ….سخنتي البامية عشان امك قربت تيجي من الشغل…
شيماء: لا …ماما قالتلي انها هتجيب معاها بيتزا عشان ان جبت ١٠ على ١٠ ف الاملاء!
الحجة: ايديكم سيبة ….النبي اكل برة ده كله قرف احنا عارفين بيعملوه ازاي !
شيماء: ده انتي اخر مرة اكلتي نص البيتزا ….خلاص المرة دي بلاش تاكلي منها …و نسخن لك البامية !
الحجة: طول مانتوا بتصرفوا يمين وشمال ربنا مش هيبارك في القرش … يا بت دي مصاريف ملهاش لازمة …ده حتى ابوكي اللي مسافر السعودية عشان يساعد …بقاله شهرين مبعتش ولا مليم …
شيماء: عشان مشوه من الشغل بعد الكورونا…مش ذنبه….بعدين هو عمره ما قصر معانا وانتي بالذات بيبعت لك ادويتك اللي بالشئ الفلاني…يبقي الأصول تحمدي ربنا و تبطلي شكوى !
الحجة بصوت واطي: جتك نيلة انتي و ابوكي….المهم انا رايحة اصلي العصر و انتي صبي الشاي ….
شيماء: ماشي بس اعملي حسابك اني مش هعمل حاجة تاني لان المسلسل التركي هيبتدي كمان شوية ….
الحجة : قوطعت المسلسلات….هو انتي طول ما بتتفرجي على التركي ده عمرك ما هتذاكري….نهايته اقوم أصلي بدل ما اتنقط!
المشهد بقلمي
الصورة بعدسة Doaa Adel