اسمي راضي وطول عمرى راضي بس عايز أفضفض واقول ان الكيل طفح اللهم إني أستغفرك وأتوب اليك
أنا طلعت على المعاش من كم شهر و عندي ولد وبنات متخرجين من الجامعه بس ابني قلبه مكسور من ساعة ما ظلموه في الجامعه ومتعينش معيد لان في زميله أبوة ضاكتور كبير في الجامعة خدوه معيد بدل ابني عشان الواسطة !!
حامد ابني من ساعتها وهو مكدر لحد ما جه قالي انه عايز يسافر برة يسعى زي كتير من زمايله ما سافروا !! هقول ايه الواد قفل من الظلم وعايز يهج و يسيب البلد ومقدرش ألوم عليه !! ما هو لازم يسافر ويعمل قرش عشان مستقبله بس الواد هيوحشني اوى اصل حامد ده مش بس ابني ده صاحبي وساعات ابويا عمره ما غلبني طول عمره شاطر في العلام يلا ربنا يوفقه
أنا بنتي فهي متخرجة من معهد تمريض وما شاء الله عليها شاطرة في شغلها بس نفسي اني اتجوزها بس ازاي ومنين !
دي عايزة مصاريف ياما للجهاز والعفش والفرح وحبيتي مش عايزة تحسسني اني مقصر وبتساعدني في مصاريف البيت وقالت لي انها مش مستعجلة عالجواز وده اللي تعبني انها بتحاول تبين لي انها راضية ربنا يحميها واكيد نصيبها هيجي لها اما جماعتي الست ام حامد دي الهدية اللي ربنا رزقني بيها لما عرفت اني طلعت معاش ولسة بدور على شغل راحت طبخت في البيت وابتدت تبيع الاكل للستات اللي بيشتغلوا و طلبة الجامعه وما شاء الله ربنا رزقها وانا فرحان بيها رغم انها بتتعب اوى من وقفه المطبخ ورغم كده علطول راضية وبتضحك ف وشي
أنا جايز اكون انظلمت في حياتي بس اكبر حاجة كسبتها نعمة الزوجة الصالحة والعيال البارين بيا اومال ولادي دول بفلوس الدنيا كلها ربنا عالم أنا بحبهم اد ايه وفخور بيهم لان تربيتي طمرت فيها
يا رب بشكرك على نعمك اللي مغرقاني وسامحني لو ساعات اشتكيت من قلة المال وضيق الحال
اغفر لي يا رب واغمرني أنا و اهلي بنعمة الستر
انك ستار غفور رحيم
الكلام من خيالي
الصورة بعدسة
Ahmed Fahmy
#حواديت_مروة_الحمدي
#مشهد #حدوتة